တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် ပအိုဝ်းငြိမ်းချမ်းရေးအဖွဲ့(PNO)အသွင်ပြောင်းပြည်သူ့စစ်ဌာနေအဖွဲ့နာယကဦးအောင်ခမ်းထီ နှင့်တွေ့ဆုံ၊ ကယားပြည်နယ်ရှိတိုင်းရင်းသား ခေါင်းဆောင်များအား တွေ့ဆုံ

 

နေပြည်တော်၊ စက်တင်ဘာ - ၁၂

         

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်သည်ဇနီး ဒေါ်ကြူကြူလှ၊ ကာကွယ်ရေး ဦးစီးချုပ်(ရေ)ဗိုလ်ချုပ်ကြီး တင်အောင်စန်းနှင့်ဇနီး၊ ကာကွယ်ရေးဦးစီးချုပ်(လေ)ဗိုလ်ချုပ်ကြီး မောင်မောင်ကျော် နှင့်ဇနီး၊ ကာကွယ်ရေး ဦးစီးချုပ်ရုံး(ကြည်း)မှ တပ်မတော်အရာရှိကြီးများ၊ အရှေ့ပိုင်းတိုင်းစစ်ဌာနချုပ်တိုင်းမှူး ဗိုလ်ချုပ်လင်းအောင်နှင့်တာဝန်ရှိသူများလိုက်ပါပြီး ယနေ့မွန်းလွဲပိုင်းတွင်တောင်ကြီး မြို့နယ်၊ ကျောက်တလုံး ကြီးမြို့သို့ရောက်ရှိရာ ပအိုဝ်းငြိမ်းချမ်းရေးအဖွဲ့ (PNO) အသွင်ပြောင်း ပြည်သူ့စစ်ဌာနေအဖွဲ့ နာယကအဖွဲ့ဝင် ဦးနေ၀င်းထွန်း၊ တာဝန်ရှိသူများ နှင့် ဒေသခံပြည်သူများကကြိုဆိုနှုတ်ဆက်ကြသည်။

         

ထို့နောက်တပ်မတော်ကာကွယ်ရေးဦးစီးချုပ်သည် ပအိုဝ်းငြိမ်းချမ်းရေးအဖွဲ့ (PNO) အသွင်ပြောင်း ပြည်သူ့ စစ်ဌာနေအဖွဲ့နာယက ဦးအောင်ခမ်းထီနှင့်တွေ့ဆုံသည်။ ဦးစွာပအိုဝ်းငြိမ်းချမ်းရေးအဖွဲ့(PNO) အသွင်ပြောင်း ပြည်သူ့စစ် နာယကအဖွဲ့ဝင် ဦးနေ၀င်းထွန်းက ပအိုဝ်းငြိမ်းချမ်းရေးအဖွဲ့(PNO) ၏ငြိမ်းချမ်းရေး ဆောင်ရွက်ခဲ့မှု အခြေအနေများနှင့် ကျောက်တလုံးကြီးဒေသဖွံ့ဖြိုးတိုးတက်ရေးအတွက် ဆောင်ရွက်နေမှု အခြေအနေများ အားရှင်းလင်းတင်ပြသည်။

         

၎င်းနောက် တပ်မတော်ကာကွယ်ရေးဦးစီးချုပ်က တိုင်းရင်းသားလက်နက်ကိုင်များအနေဖြင့် မိမိတို့ တိုင်းရင်း သားနှင့် ဒေသကာကွယ်ရေးအားအကြောင်းပြပြီး လက်နက်စွဲကိုင်လို သောသဘောထားများ ရှိကြောင်း၊ ဒေသအတွင်းတရားဥပဒေစိုးမိုးရေး ရှိအောင် ဆောင်ရွက်ရမည်ဖြစ်ပြီး ၎င်းတာဝန်ကို အုပ်ချုပ်ရေးအဖွဲ့ အစည်းများနှင့် မြန်မာနိုင်ငံရဲတပ်ဖွဲ့ကဆောင်ရွက်ရွက်ရမည်ဖြစ်ကြောင်း၊ နိုင်ငံတော် ကာကွယ်ရေး တာဝန်ကိုမူ နိုင်ငံတော်၏တစ်ခုတည်းသောကာကွယ်ရေးအဖွဲ့အစည်းဖြစ် သည့်တပ်မတော်က ဆောင်ရွက် ရမှာ ဖြစ်ကြောင်း၊ စစ်မှန်သောထာဝရငြိမ်းချမ်းရေး ရရှိရန်အတွက် ၎င်းအဆင့်ကို ရောက်ရှိအောင် မဖြစ်မနေ ဆောင်ရွက်ရမည်ဖြစ်ကြောင်း ဦးစွာပြောကြားသည်။

         

ယင်းနောက် တပ်မတော်ကာကွယ်ရေးဦးစီးချုပ်ဗိုလ်ချုပ်မှူးကြီးမင်းအောင်လှိုင်က  အစိုးရနှင့်တပ်မတော်မှ ထာဝရငြိမ်းချမ်းရေးရရှိအောင်ဆောင်ရွက်နေမှု အခြေအနေများ၊ ကျောက်တလုံးကြီး ဒေသဖွံ့ဖြိုးတိုးတက် ရေးဆောင်ရွက်ရာတွင် တပ်မတော်မှတတ်နိုင်သည့် ဘက်မှကူညီဆောင်ရွက်ပေးမည့်အခြေအနေများ၊ ကျောက်တလုံးကြီးဒေသအတွင်းမူးယစ် ဆေးဝါးကင်းစင်ရေးအတွက်ဆောင်ရွက်ရန်နှင့် တိုင်းရင်းသားများ ၏ပညာရည်မြင့်မား ရေး ကိုဆောင်ရွက်ပေးရန်လိုအပ်သည့်အခြေအနေများအားဆွေးနွေးပြောကြားသည်။

         

ယင်းနောက်တပ်မတော်ကာကွယ်ရေးဦးစီးချုပ်က ပအိုဝ်းတိုင်းရင်းသား ခေါင်းဆောင် ဦးအောင်ခမ်းထီအား လက်ဆောင်ပစ္စည်းများပေးအပ်ပြီး ကျောက်တလုံးကြီးမြို့၊ ဗိုလ်ပန္တ ကုန်းတော်ရှိ မဟာဝိသဗုဒ္ဓဂယာမြို့ ဦးစေတီတော်အတွက် တပ်မတော်(ကြည်း၊ရေ၊လေ) မိသားစုများမှလှူဒါန်းသည့် အလှူငွေများအားပေး အပ်လှူဒါန်းသည်။ ထို့နောက် ပအိုဝ်းတိုင်းရင်းသား ခေါင်းဆောင်ဦးအောင်ခမ်းထီက တပ်မတော်ကာကွယ် ရေးဦးစီးချုပ်ထံ ဒေသထွက် လက်ဆောင်ပစ္စည်းများပြန်လည်ပေးအပ်သည်။

         

ထို့အတူ တပ်မတော်ကာကွယ်ရေးဦးစီးချုပ်သည် နံနက်ပိုင်းကလည်း ကယားပြည်နယ် အတွင်းရှိ တိုင်းရင်းသားခေါင်းဆောင်များနှင့် ဒေသကွပ်ကဲမှုစစ်ဌာနချုပ်(လွိုင်ကော်)ရှိ အစည်းအဝေးခန်းမ၌ တွေ့ဆုံသည်။ အဆိုပါတွေ့ဆုံပွဲသို့ တပ်မတော်ကာကွယ်ရေး ဦးစီးချုပ်နှင့်အတူ ကာကွယ်ရေးဦးစီးချုပ်(ရေ) ဗိုလ်ချုပ်ကြီး တင်အောင်စန်း၊ ကာကွယ်ရေး ဦးစီးချုပ်(လေ) ဗိုလ်ချုပ်ကြီး မောင်မောင်ကျော်၊ ကာကွယ်ရေး ဦးစီးချုပ်ရုံး(ကြည်း)မှ တပ်မတော်အရာရှိကြီးများ၊ အရှေ့ပိုင်းတိုင်းစစ်ဌာန ချုပ်တိုင်းမှူးဗိုလ်ချုပ်လင်းအောင်နှင့် တာဝန်ရှိသူများတက်ရောက်ကြပြီး နယ်ခြားစောင့် တပ်များ၏ဗဟိုအကြံပေးနှင့် ကွပ်ကဲရေးအဖွဲ့၊ ဂုဏ်ထူး ဆောင်ဗိုလ်မှူးကြီး ထွန်းကျော်၊  ကရင်နီအမျိုးသားတိုးတက်ရေး ပါတီ(KNPP) ၊ ကရင်နီအမျိုးသားစည်းလုံး ညီညွတ်ရေးအဖွဲ့ဥက္ကဋ္ဌ ဦးရစ်ချဒ်၊ ကယန်းအမျိုးသားကာကွယ်ရေးတပ်(KNG)ဥက္ကဋ္ဌ ဦးဌေးကို၊ ကရင်နီ အမျိုးသားတိုးတက်ရေး ပါတီ(KNPP) ၊ ကရင်နီအမျိုးသားငြိမ်းချမ်းရေးနှင့်ဖွံ့ဖြိုးရေးပါတီ(KNPDP) ဒုတိယဥက္ကဋ္ဌ ဦးအောင်အောင်၊ ငြိမ်းချမ်းရေးအကျိုးဆောင်များဖြစ်ကြသည့် ဦးပေါလုချမ်း၊ ဦးခီးရယ်နှင့် တာဝန်ရှိသူများ တက်ရောက်ကြသည်။

         

ထိုသို့တွေ့ဆုံစဉ်ကယားပြည်နယ်တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးသည် မိမိတို့အားလုံးနှင့် သက်ဆိုင်ပါကြောင်း၊ ဒေသတည်ငြိမ်အေးချမ်းရေးအတွက် ဆောင်ရွက်ရာတွင် အဖွဲ့အစည်းများ၊ ပါတီများ၊ လူမှုရေးအသင်းအဖွဲ့များနှင့် ဥပဒေဘောင်အတွင်းဝင်ရောက်ရန်ကျန်ရှိနေသည့် တိုင်းရင်းသားအဖွဲ့အစည်းများ အားလုံးပါဝင်ဆောင်ရွက်ရမည်ဖြစ်ကြောင်း၊ ၁၉၈၈ ခုနှစ်နိုင်ငံရေးမတည်ငြိမ်မှု များကြောင့်ဖြစ်ပေါ်မှုကြောင့် တပ်မတော်မှဝင်ရောက်ထ်ိမ်းသိမ်းဆောင်ရွက်ခဲ့ရကြောင်း၊ ပြည်သူများမှတောင်းဆိုသည့် ပါတီစုံ ဒီမိုကရေစီ စနစ်ကိုတပ်မတော်အစိုးရမှ အကောင် အထည်ဖော်ပေးခဲ့ရကြောင်း၊ ငြိမ်းချမ်းရေးလုပ်ငန်းများ ဆောင်ရွက် နေရခြင်း၏ရည်ရွယ်ချက်မှာ လက်ရှိကျင့်သုံးနေသည့်ပါတီစုံဒီမိုကရေစီလမ်းကြောင်းတွင် တိုင်းရင်းသား ပြည်သူအားလုံး ဒီမိုကရေစီအခွင့်အရေးများကို တန်းတူညီမျှခံစားနိုင်ရန်ဖြစ်ကြောင်း၊  ထို့ကြောင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) အား တိုင်းရင်းသားလက်နက်ကိုင်အဖွဲ့အစည်းများ အားလုံး လက်မှတ်ရေးထိုးသွားမှသာ ထာဝရငြိမ်းချမ်းရေးရရှိမည်ဖြစ်ကြောင်းရှင်းလင်းပြောကြားသည်။

         

ထို့နောက် ဒီမိုကရေစီစနစ်အားဖော်ဆောင်ရာတွင် ရှုမြင်ပုံနှင့် ချဉ်းကပ်ပုံများ ကွဲပြားမှုရှိနိုင်သော်လည်း တည်ငြိမ် အေးချမ်းရေးနှင့်ဖွံ့ဖြိုးတိုးတက်ရေးကို အဓိကထား လက်တွေ့ကျကျဆောင်ရွက်ရမည်ဖြစ်ကြောင်း၊ ဖွံ့ဖြိုးတိုးတက်ရေးဆိုသည်မှာ အပြော လွယ်သလောက်လက်တွေ့ လုပ်ဆောင်ရာတွင် ၀ါယမစိုက်ထုတ်ရ မှုများပြားကြောင်း၊ ဖွံ့ဖြိုး တိုးတက်စေရန်အတွက် ကုန်ထုတ်စွမ်းအားရှိရမည်ဖြစ်ပြီး ၎င်းကုန်ထုတ်စွမ်းအားကို အတတ်ပညာနှင့် အရင်းအနှီးတို့ပေါင်းစပ်ပြီးမှရရှိနိုင်မည်ဖြစ်ကြောင်း၊ ထို့ကြောင့် ဒေသအလိုက် ပညာရေးကို အထူးအားပေးဆောင်ရွက်ရမည်ဖြစ်ကြောင်း၊ တိုင်းရင်းသားလက်နက်ကိုင် အဖွဲ့အစည်းများအနေဖြင့် ဥပဒေ ဘောင်အတွင်းမှနေ၍ဖွံ့ဖြိုးရေးလုပ်ငန်းများကို ရိုးသား စွာဆောင်ရွက်သွားရန်လိုအပ်ကြောင်း၊ ဒေသအတွင်း တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) တွင်လက်မှတ်ရေးထိုးရန်ကျန်ရှိသည့် KNPP တိုင်းရင်းသားလက်နက်ကိုင်အဖွဲ့ကိုလည်း စည်းရုံးဆောင်ရွက်သွားရန်လိုအပ်ကြောင်း၊ ကျန်အဖွဲ့ အစည်းများအနေဖြင့်လည်း ပစ်ခတ်တိုက်ခိုက်မှုရပ်စဲ၍ငြိမ်းချမ်းရေးဆောင်ရွက် လာသည်မှာ နှစ် ၂၀ ခန့်ရှိ နေပြီဖြစ်သဖြင့် ဒေသဖွံ့ဖြိုးရေးလုပ်ငန်းများသည် ယခင်က ထက်နှစ်ဆခန့်တိုးတက်နေရန်လိုအပ်ကြောင်း၊ ဘက်ပေါင်းစုံမှစဉ်းစားပြီး စည်းလုံးညီညွတ် စွာဆောင်ရွက်သွားရမည်ဖြစ်ကြောင်း၊ မည်သည့်နိုင်ငံတွင် မဆိုနိုင်ငံတော်ကာကွယ်ရေး အတွက်တာဝန်ယူဆောင်ရွက်နေရသော လက်နက်ကိုင်အဖွဲ့အစည်းမှာ တစ်ခုတည်းသာ ရှိကြောင်း၊ ၎င်းမှာသက်ဆိုင်ရာနိုင်ငံအလိုက်၏တပ်မတော်သာဖြစ်၍ မိမိတို့နိုင်ငံ၏ ဒီမိုကရေစီ လမ်းကြောင်းပေါ်လျှောက်လှမ်းရာတွင်လည်း ထိုကဲ့သို့ဆောင်ရွက်ရန်လိုအပ် ကြောင်း၊ အရှိတရားအား လက်ခံပြီး အသိတရားရှိရှိဒေသခံပြည်သူလူထုအပေါ် ကိုယ်ချင်း စာစိတ်ထား၍ဆောင်ရွက်သွားရန် လိုအပ် ကြောင်းမှာကြားသည်။

         

ယင်းနောက်အခမ်းအနားတက်ရောက်လာကြသူများက အဖွဲ့အစည်းတစ်ခုချင်းအလိုက် ဒေသဖွံ့ဖြိုးရေး လုပ်ငန်းများနှင့် ငြိမ်းချမ်းရေးလုပ်ငန်းများဆောင်ရွက်နေမှု အခြေအနေများအားရှင်းလင်း တင်ပြကြရာ တပ်မတော်ကာကွယ်ရေးဦးစီးချုပ်က လိုအပ်သည်များဖြည့်ဆည်းဆောင်ရွက်ပေးပြီး လက်ဆောင်ပစ္စည်းများ ပေးအပ်ခဲ့ကြောင်း သတင်းရရှိသည်။

Recent News