တိုင်းပြည်ကိုကာကွယ်နိုင်ရန်အတွက် တပ်မတော်သည် ကာကွယ်ရေးစွမ်းပကား တောင့်တင်းခိုင်မာအောင် အမြဲမပြတ်ဆောင်ရွက်ရန်လို

နေပြည်တော်၊ ဖေဖော်ဝါရီ - ၃

တိုင်းပြည်ကိုကာကွယ်နိုင်ရန်အတွက် တပ်မတော်သည် ကာကွယ်ရေးစွမ်းပကား တောင့်တင်းခိုင်မာအောင် အမြဲမပြတ်ဆောင်ရွက်ရန်လိုအပ်ကြောင်း၊ တပ်မတော်သည် စွမ်းရည်၊ စွမ်းအားရှိသည့် တပ်မတော်ဖြစ်ရန် လိုကြောင်း၊ အရည်အချင်းရှိသည့်တပ်မတော် ဖြစ်အောင် လေ့ကျင့်ရေးဖြင့် တည်ဆောက်ရမည်ဖြစ်ကြောင်းဖြင့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ယနေ့နံနက်ပိုင်းတွင် ပုသိမ်တပ်နယ်၌ ကျင်းပပြုလုပ်သည့် တပ်မတော်(ကြည်း၊ရေ၊လေ)ပူးပေါင်းစစ်ဆင်ရေး လေ့ကျင့်ခန်း (ဆင်ဖြူရှင်)တွင် ပါဝင်ဆောင်ရွက်ခဲ့ကြသည့် အရာရှိ၊ စစ်သည်များအား အမှာစကားပြောကြားရာတွင်ထည့်သွင်း ပြောကြား သည်။

နိုင်ငံတော်လုံခြုံရေးနှင့်ကာကွယ်ရေးအတွက်ရည်မှန်း၍ သမားရိုးကျစစ်ပွဲများ ဆင်နွှဲနိုင်သည့် စွမ်းရည်မြင့်မား လာစေရန်အတွက် အနောက်တောင်တိုင်းစစ်ဌာနချုပ် ပုသိမ်တပ်နယ်တွင် လေ့ကျင့်ဆောင်ရွက်လျက်ရှိသည့် တပ်မတော်(ကြည်း၊ရေ၊လေ) ပူးပေါင်းစစ်ဆင်ရေးလေ့ကျင့်ခန်း(ဆင်ဖြူရှင်) ဒုတိယပိုင်းလေ့ကျင့်ဆောင်ရွက် နေမှုများကို တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်တက်ရောက်ကြည့်ရှု စစ်ဆေးသည်။ အဆိုပါလေ့ကျင့်ခန်းသို့ တပ်မတော်ကာကွယ်ရေးဦးစီးချုပ်နှင့်အတူ ကာကွယ်ရေးဦးစီးချုပ်(ရေ) ဗိုလ်ချုပ်ကြီး တင်အောင်စန်း၊ ကာကွယ်ရေးဦးစီးချုပ်(လေ) ဗိုလ်ချုပ်ကြီး မောင်မောင်ကျော်၊ ကာကွယ်ရေးဦးစီးချုပ်ရုံးမှတပ်မတော်အရာရှိကြီးများ၊ အနောက်တောင်တိုင်းစစ်ဌာနချုပ်တိုင်းမှူး၊ တပ်မတော် (ကြည်း၊ရေ၊လေ)လက်ရုံး တပ်ဖွဲ့များမှ တပ်မတော်သားများ၊ ပြည်တွင်းသတင်းမီဒီယာများမှ သတင်းထောက် များ တက်ရောက်ကြသည်။

ဦးစွာတပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည်(ကြည်း၊ရေ၊လေ)ကမ်းတက်စစ်ဆင်ရေးပြုလုပ်မည့် ရှုရပ်သို့ရောက်ရှိကြပြီး လေ့ကျင့်ခန်းအားအစီအစဉ် အတိုင်းပြုလုပ်ကြရာ မြစ်ကူးစစ်ဆင်ရေးအဖွဲ့၊ ရေတပ် အထူး စစ်ဆင်ရေးတပ်ဖွဲ့များ၊ ခြေလျင်တပ်ဖွဲ့နှင့် သံချပ်ကာတပ်ဖွဲ့များ မြစ်ကူးစစ်ဆင်ရေးလေ့ကျင့်မှုများ ဆောင်ရွက်ကြသည်။ တစ်ချိန်တည်းတွင် တပ်မတော်(လေ)မှတိုက်ပွဲ နယ်မြေအတွင်းရှာဖွေ ကယ်ဆယ်ရေး ဆောင်ရွက်ခြင်းများဆောင်ရွက်ကြသည်။

ထိုသို့ဆောင်ရွက်နေစဉ်အတွင်း ရဟတ်ယာဉ်ချီအထူးတပ်ဖွဲ့များက ရန်သူ့စခန်းများ အားအလစ်အငိုက် ၀င်ရောက်စီးနင်းတိုက်ခိုက်ခြင်း၊ လေကြောင်းချီတပ်ဖွဲ့များက လေထီးဖြင့် မြေပြင်သို့ဆင်းသက်ကာ ရန်သူ့ အုပ်ချုပ်ထောက်ပံ့ရေးစခန်းများအား စီးနင်းတိုက်ခိုက်ခြင်းများ ဆောင်ရွက်ကြသည်။

တစ်ချိန်တည်းတွင်တပ်မတော်(လေ)မှ တိုက်လေယာဉ်များ၊ ရဟတ်ယာဉ်များက ရန်သူ့ပစ်မှတ်အသီးသီး အားတိုက်ခိုက်ခြင်း၊ အမြောက်ကြီးများက ပစ်ခတ်၍ချေမှုန်းခြင်း၊ ခြေလျင်နှင့်သံချပ်ကာကမ်းတက် တပ်ဖွဲ့များ ကမ်းတက်ခြင်း၊ ထပ်မံစစ်ကူရောက်ရှိလာသည့် ရန်သူ့စစ်ရေယာဉ်များအား တပ်မတော်(ရေ)မှစစ်ရေယာဉ် များကပင်လယ်ရေပြင်တွင်ပင်တိုက်ခိုက်ချေမှုန်းခြင်း၊ ကမ်းတက်တပ်ဖွဲ့များက ရန်သူ့စခန်းအားစီးနင်း တိုက်ခိုက်ခြင်းများဆောင်ရွက်ကြပြီး ရည်မှန်းချက်အသီးသီးသို့ တိုက်ပွဲလုပ်ငန်းအဆင့် အလိုက်အတိုင်း ထိုးဖောက်ဝင်ရောက်၍ ရန်သူကိုချေမှုန်း တိုက်ခိုက်ပြီး ရည်မှန်းချက်အသီးသီးကိုသိမ်းပိုက်ကြသည်။

ယင်းနောက်မိမိတပ်များအတွက်လေကြောင်းမှ ခဲယမ်းနှင့်ရိက္ခာများချပေးခြင်း၊ တိုက်ပွဲတွင်ထိခိုက်ဒဏ်ရာ ရရှိသူများကိုအရေးပေါ်လူနာတင်ယာဉ်များဖြင့် သယ်ဆောင်ခြင်း၊ အရေးကြီးလူနာများကို ရဟတ်ယာဉ်ဖြင့် သယ်ဆောင်ခြင်းများအား လေ့ကျင့်ဆောင်ရွက် ကြပြီး လေ့ကျင့်ခန်းပြီးဆုံးရပ်နားခဲ့သည်။

ထို့နောက် လေ့ကျင့်ခန်းတွင်ပါဝင်ခဲ့ကြသည့် အရာရှိ၊ စစ်သည်များအား တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်က အမှာစကားပြောကြားရာတွင် ယခုကျင်းပပြုလုပ်သည့်လေ့ကျင့်ခန်းအား တပ်မတော်(ကြည်း၊ရေ၊လေ)တပ်ဖွဲ့ဝင်များအားလုံးပူးပေါင်း၍အောင်မြင်စွာဆောင်ရွက်နိုင်ခဲ့သဖြင့်ချီးကျူးပါကြောင်း၊ ယခုလေ့ကျင့် ခန်းမှတွေ့ကြုံရသည့် အတွေ့အကြုံများကိုပြန်လည်သုံးသပ်၍ အားနည်းချက်များကို သင်ခန်းစာဖေါ်ထုတ် ပြုပြင်ဆောင်ရွက်ရန်လိုကြောင်း၊ ယခုကဲ့သို့တပ်မတော် (ကြည်း၊ရေ၊လေ) ပူးပေါင်းစစ် ဆင်ရေးလေ့ကျင့်ခန်းများကို လွန်ခဲ့သည့် နှစ် ၂၀ ကနှစ်ကြိမ် ပြုလုပ်လေ့ကျင့်ခဲ့ကြောင်း၊ ယခုကဲ့သို့လေ့ကျင့် ဆောင်ရွက်နိုင်ရန်အတွက် ကြိုတင်ပြင်ဆင် လေ့ကျင့်ခြင်းများဆောင်ရွက်ခဲ့ပြီး လေ့ကျင့်ခန်းများမှ ရရှိလာ သည့် အတွေ့အကြုံများဖြင့် တပ်မတော်(ကြည်း၊ရေ၊လေ)တပ်ဖွဲ့များ အားပေါင်းစပ်လေ့ကျင့်နိုင်ခဲ့ခြင်းဖြစ် ကြောင်း၊ တိုင်းပြည်ကာကွယ်ရေးဆိုသည်မှာ ချက်ချင်းဆောင်ရွက်၍မရဘဲ စနစ်တကျပြင်ဆင် ဖွဲ့စည်း လေ့ကျင့်ခြင်းများပြုလုပ်ခြင်းဖြင့်သာဆောင်ရွက်နိုင်ကြောင်း၊ မိမိတို့တစ်ဦးချင်းအလိုက်၊ တပ်ဖွဲ့အလိုက်၊ တပ်ရင်းအလိုက်လေ့ကျင့်ဆောင်ရွက်၍ နောက်ဆုံး(ကြည်း၊ရေ၊လေ) တပ်များအားလုံးအဆင့်ဆင့် ပြန်လည် ပေါင်းစပ်လေ့ကျင့်ရခြင်းဖြစ်ကြောင်းရှင်းလင်း ပြောကြားသည်။

ယင်းနောက် စစ်၏သဘောတရားမှာအမြဲပြောင်းလဲလျက်ရှိပြီး မိမိတုိ့အနေဖြင့် အမြဲလေ့လာနေရန်လိုကြောင်း၊ စစ်လက်နက်ပစ္စည်းများသည်လည်းခေတ်အလိုက်မျိုးစုံ ပြောင်းလဲတိုးတက်လာခြင်းကြောင့် စစ်နည်းဗျူဟာ ကျင့်သုံးမှုများလည်းပြောင်းလဲလာကြောင်း၊ ထို့ကြောင့်မိမိတို့သည် တိုးတက်ပြောင်းလဲလျက်ရှိသည့် နည်းပညာရပ်များ ကိုခေတ်နှင့်အညီ ပြောင်းလဲအသုံးပြုနိုင်ရန်လေ့လာနေရမည်ဖြစ်ကြောင်း၊ ထို့ကြောင့် မိမိတို့၏လေ့ကျင့်ရေးမူဝါဒနှင့်အညီအမြဲလေ့လာ၊ အမြဲလေ့ကျင့်၊ အမြဲလိုက်နာနေရန် လိုအပ်ကြောင်း၊ ယခုကဲ့သို့လေ့ကျင့်ရေးလုပ်ငန်းများအား မိမိတို့နိုင်ငံတွင်သာမက ကမ္ဘာ့နိုင်ငံအသီးသီးတွင်လည်း ဆောင်ရွက်လျက်ရှိကြောင်း၊ ထိုသို့လေ့ကျင့်ဆောင်ရွက်ခြင်းမှာ မိမိတို့နိုင်ငံအားကာကွယ်နိုင်ရန်ဖြစ်ပြီး ထိုသို့ ကာကွယ်နိုင်ရန် ကြိုတင်ပြင်ဆင်မှု ပြုလုပ်ခြင်းသည် တပ်မတော်တိုင်း၏တာဝန်ဖြစ်ကြောင်း၊ မိမိတို့နိုင်ငံကဲ့သို့ လွတ်လပ်ရေးဆုံးရှုံးခဲ့ရဘူးသည့် နိုင်ငံတစ်နိုင်ငံအတွက် ကာကွယ်ရေးစွမ်းရည်၊ စွမ်းအားများ ပိုမိုလိုအပ်ပြီး လွတ်လပ်ရေးဆုံးရှုံးခဲ့ရခြင်းမှာခေတ်မီသည့် တပ်မတော်တစ်ရပ်မရှိခဲ့ခြင်း၊ စည်းလုံးညီညွတ်မှု အားနည်းခြင်း တို့ကြောင့်ဖြစ်ကြောင်း၊ နိုင်ငံကြီးများနှင့်ရင်ဆိုင်နေရသည့် နိုင်ငံများ၊ ခြိမ်းခြောက်ခံနေရသည့် နိုင်ငံငယ်များသည် ကာကွယ်ရေးအတွက်ပြင်ဆင်မှုများ နိုင်ငံတိုင်းဆောင်ရွက်လျက်ရှိသည်ကိုတွေ့ရှိရကြောင်း၊ ကာကွယ်ရေးစွမ်းပကား အားနည်းပါက ထိပါးစော်ကားခြင်း၊ ခြိမ်းခြောက်ခြင်းများခံရမည်ဖြစ်ကြောင်း ရှင်းလင်း ပြောကြားသည်။

ဆက်လက်ပြီး မိမိတို့နိုင်ငံလွတ်လပ်ရေးရရှိရန်အတွက် ဗိုလ်ချုပ်အောင်ဆန်း ဦးဆောင်သည့် ရဲဘော်သုံး ကျိပ်သည် ဂျပန်နိုင်ငံသို့သွားရောက်ပြီးစစ်ပညာသင်ယူ၍ ခေတ်မီတပ်မတော်ဖွဲ့ပြီး ပြည်သူနဲ့အတူတိုက်ပွဲဝင် ခဲ့ခြင်းကြောင့် လွတ်လပ်ရေးရရှိခဲ့ခြင်း ဖြစ်သလို လွတ်လပ်ရေးရရှိချိန်မှစ၍ယခုအချိန်အထိတပ်မတော်သည် နိုင်ငံ၏ အခြေအနေအရပ်ရပ်ကိုမယိမ်းယိုင်အောင် ထိမ်းသိမ်းဆောင်ရွက်လျက်ရှိကြောင်း၊ ထို့ကြောင့်စွမ်းရည် ထက်မြက်သည့် တပ်မတော်ဖြစ်အောင်အမြဲမပြတ်လေ့ကျင့် ဆောင်ရွက်နေရမည်ဖြစ်ကြောင်း၊ လေ့ကျင့်ရေးနှင့် ပတ်သက်၍ ကျန်းမာကြံ့ခိုင်ရန်၊ ကျွမ်းကျင်ရန်၊ ရဲစွမ်းသတ္တိရှိရန် လေ့ကျင့်ရမည်ဖြစ်ကြောင်း၊ ယခုကဲ့သို့(ကြည်း၊ရေ၊လေ) ပူးပေါင်းလေ့ကျင့်မှုများတွင် ကျွမ်းကျင်မှုနှင့်ဟန်ချက်ညီစွာ ပူးပေါင်းဆောင်ရွက်မှု သည် အရေးကြီးကြောင်း ဖြင့်မှာကြားသည်။

ယင်းနောက် တပ်မတော်ကာကွယ်ရေးဦးစီးချုပ်ထံ တပ်မတော်လေ့ကျင့်ရေး အရာရှိချုပ် ဒုတိယဗိုလ်ချုပ်ကြီး မောင်မောင်အေးက တပ်မတော်(ကြည်း၊ရေ၊လေ) ပူးပေါင်းစစ်ဆင်ရေးလေ့ကျင့်ခန်း (ဆင်ဖြူရှင်) အထိမ်း အမှတ်တံဆိပ်အား လက်ဆောင်ပေးအပ်သည်။ ထို့နောက်တပ်မတော်ကာကွယ်ရေးဦးစီးချုပ်သည် သတင်း မီဒီယာအဖွဲ့များ အားရင်းရင်းနှီးနှီးနှုတ်ဆက်ပြီး သိရှိလိုသည်များမေးမြန်းမှုအပေါ်ပြန်လည်ဖြေကြားခဲ့သည်။

ယနေ့တွင် လေ့ကျင့်ခန်းဒုတိယပိုင်းအဖြစ် (ကြည်း၊ရေ၊လေ)ပူးပေါင်း၍ ကမ်းတက်စစ်ဆင်ရေးလေ့ကျင့်မှုများကို လက်တွေ့လေ့ကျင့်ဆောင်ရွက်ကြခြင်းဖြစ်ကြောင်းသတင်းရရှိသည်။

Recent News